ऊसतोडीच्या फडात अंगावर काटा आणणारा अपघात…
सोलापुरातील मोहोळ येथे धक्कादायक घटना घडलीय. ऊसतोड मजुरी करणाऱ्या एका कुटुंबातील दोघी बहिणींचा ट्रॅक्टर अंगावरून गेल्याने जागीच मृत्यू झाला आहे .चार वर्षाच्या लहान बहिणीला कडेवर घेत ट्रॅक्टरवर चढताना मोठ्या बहिणीचा पाय गेअरवर पडल्यानं हा अपघात घडला आहे. मोहोळ तालुक्यातील आष्टे गावच्या हद्दीत ऊस तोडीच्या फडात शनिवारी ही घटना घडली.
निता राजु राठोड आणि अतिश्री राजु राठोड असे मृत झालेल्या दोन बहिणींची नावे आहेत. ऊसतोडीच्या फडात काम करताना आपल्या चार वर्षांच्या बहिणीला कडेवर घेत मोठी बहीण निता राठोड (वय:20) चालू ट्रॅक्टरवर चढत होती. लहान्या अतिश्रीला घेऊन चढताना निताचा पाय ट्रॅक्टरच्या गिअरवर पडला. यामुळे ट्रॅक्टर पुढे गेल्याने दोन्ही बहिणी खाली पडल्या. ट्रॅक्टरखाली आल्यानं दोन्ही बहिणी चालू असलेला ट्रॅक्टर दोघींच्याही अंगावरून गेला. यामध्ये त्या गंभीर जखमी होऊन जागीच मृत झाल्या. ऊसाच्या बांधांवर असणारा ट्रॅक्टर चालकाने तसाच सुरु ठेवल्यामुळे निष्काळजीपणातून हा अपघात झाल्याची तक्रार मृत मुलींची आई शानुबाई राठोड यांनी केली होती. यावरून मोहोळ पोलीस ठाण्यात चालकावर गुन्हा दाखल करण्यात आला आहे.
