उत्तर प्रदेशातील जौनपूर जिल्ह्यात एका सूटकेसमध्ये तरुणीचा मृतदेह आढळल्याच्या घटनेचा अखेर उलगडा झाला आहे. पोलिसांच्या तपासात या हत्येचा गुन्हेगार तिचा प्रियकर असल्याचे स्पष्ट झाले आहे. त्यानेच हत्या करून मृतदेह सूटकेसमध्ये भरला आणि तलावाजवळील खड्ड्यात फेकून दिला.
शुक्रवारी जौनपूर कोतवाली पोलीस ठाण्याच्या हद्दीतील जेसीस चौकाजवळील झीलमध्ये एका अज्ञात तरुणीचा मृतदेह सूटकेसमध्ये आढळून आला होता. या घटनेने संपूर्ण परिसरात खळबळ उडाली. पोलिसांनी फॉरेन्सिक तज्ज्ञांच्या मदतीने तपास सुरू केला आणि नंतर या तरुणीची ओळख अनन्या साहनी, रहिवासी वाराणसी अशी पटली.
मृतदेहाची ओळख पटल्यानंतर पोलिसांनी सर्विलांस आणि सीसीटीव्ही फुटेजच्या आधारे तपास सुरू केला. चौकशीत असे समोर आले की, अनन्या आणि तिच्या गावातील विशाल साहनी यांचे गेल्या काही वर्षांपासून प्रेमसंबंध होते. तसेच अनन्याचे यापूर्वी लग्न ठरले होते, परंतु काही कारणाने ते तुटले होते.
जौनपूरचे एसपी सिटी अरविंद वर्मा यांनी दिलेल्या माहितीनुसार, २५ फेब्रुवारी रोजी अनन्या आणि विशाल जौनपूरच्या मच्छलीशहर परिसरातील भाड्याच्या खोलीत एकत्र होते. यावेळी दोघांमध्ये कोणत्यातरी कारणावरून भांडण झाले. वाद वाढल्यावर अनन्याने लोखंडी हत्याराने विशालवर हल्ला केला. संतप्त झालेल्या विशालने तेच हत्यार अनन्याच्या हातातून हिसकावून घेतले आणि तिच्या डोक्यावर जोरदार वार केले. गंभीर दुखापतीमुळे अनन्याचा जागीच मृत्यू झाला.
हत्या केल्यानंतर विशालने पुरावे नष्ट करण्यासाठी तिचे हात-पाय दोरीने बांधले, तोंडात कपडा कोंबला आणि मृतदेह लाल रंगाच्या सूटकेसमध्ये ठेवला. काही अंतर सूटकेस ट्रॉलीद्वारे ओढत नेल्यानंतर ई-रिक्शाने तलावाजवळील खड्ड्यात तो फेकून दिला. हत्या करून मृतदेह तलावामध्ये टाकल्यानंतर विशाल बनारसला निघून गेला. तेथे जाऊन त्याने गंगेत स्नान केले आणि मुंडनही केले. त्यानंतर तो फरार होण्याच्या प्रयत्नात असतानाच पोलिसांनी त्याला पकडले.
घटनेनंतर पोलिसांनी सीसीटीव्ही आणि सर्विलांसच्या मदतीने विशालचा माग काढला. त्याच्या हालचाली ट्रॅक करत असताना तो जौनपूरच्या भंडारी रेल्वे स्थानकावर असल्याचे समजले. पोलिसांनी त्वरित कारवाई करत त्याला तेथून अटक केली. चौकशीत विशालने आपला गुन्हा कबूल केला आणि हत्येत वापरलेले हत्यारही पोलिसांच्या हाती लागले.
या प्रकरणाने जौनपूर जिल्ह्यात एकच खळबळ उडाली आहे. प्रेमसंबंधातील तणाव, भांडण आणि आक्रोशातून एका तरुणीचा निर्घृण खून झाला. पोलिसांनी जलद तपास करून आरोपीला पकडले आणि न्यायालयीन प्रक्रिया सुरू केली आहे.
