अंबा (ता. शिरपूर), सांगवी वनविभागातील परिमंडळ खंबाळा येथील नियतक्षेत्र अंबा मधील कक्ष क्रमांक ८३३ मध्ये वनविभागाच्या अधिकाऱ्यांनी मका, ज्वारी, बाजरीच्या मिश्र उभ्या पिकामध्ये लपवून ठेवलेला सुका गांजा साठा गुप्त माहितीनंतर जप्त केला आहे. या कारवाईत अंदाजे ११०० किलो गांजा जप्त करण्यात आला असून त्याची एकूण बाजारमूल्य सुमारे ५५ लाख रुपये असल्याचा अंदाज आहे.
नेहमीप्रमाणे गस्त घालत असताना वनरक्षक श्री. पवन राजाराम पावरा यांना संशयास्पद हालचाली लक्षात आल्या. त्यांनी प्रलंबित वनदावा क्षेत्रात पिकांची पाहणी केली असता, त्या ठिकाणी निळ्या प्लास्टिक ड्रममध्ये, गोण्यांमध्ये, पत्र्याच्या कोठीत आणि कापडात बांधलेल्या गाठोड्यांमध्ये मोठ्या प्रमाणात सुकवलेला गांजा आढळून आला.
सदर माहिती तत्काळ उपवनसंरक्षक नितीन सिंग यांना देण्यात आली. त्यांनी पोलीस अधिक्षक श्रीकांत धिवरे यांना याची कल्पना दिली. त्यानंतर सहा. वनसंरक्षक राहुल घरटे यांनी सांगवी पोलीस स्टेशनशी संपर्क साधून अधिकृत पत्रव्यवहार केला.
यानंतर पोलीस निरीक्षक जयपाल हिरे, पोलीस उपनिरीक्षक वसावे, वनविभागाचे अधिकारी आणि पोलीस कर्मचारी यांच्या संयुक्त पथकाने घटनास्थळी धाव घेतली. प्रत्यक्ष पाहणीत अंमली पदार्थ गांजा मोठ्या प्रमाणावर आढळून आला.
सदर गांजा जप्त करून सांगवी पोलीस स्टेशनमध्ये आणण्यात आला असून यासंदर्भात पुढील तपास सुरु आहे.
कारवाईत सहभाग घेतलेले अधिकारी/कर्मचारी:
काशिनाथ देवरे (वनपरिक्षेत्र अधिकारी, सांगवी), बिपीन महाजन (वनपाल, पळासनेर), राजेंद्र शेटे (वनपाल, सांगवी), नितीन बेडसे (वनरक्षक, चोंदीनाला),नरेंद्र चित्ते (वनरक्षक, बिजासणी), आयोध्या नागपूर्णे, माधुरी परदेशी, विद्या ठाकरे, दानिल मावची, संदीप ठाकरे, व शासकीय वाहनचालक साहेबराव तुंगार.
सदर कारवाई वनसंरक्षक निनु सोमराज, पोलीस अधिक्षक श्रीकांत धिवरे, उपवनसंरक्षक नितीनकुमार सिंग, आणि विभागीय अधिकारी राजेंद्र सदगीर यांच्या मार्गदर्शनाखाली करण्यात आली.
पोलीस व वनविभाग यांच्यात समन्वय साधून ही गोपनीय कारवाई करण्यात आली असून, सदर प्रकरणाचा सखोल तपास आणि कायदेशीर प्रक्रिया सांगवी पोलीस स्टेशनमार्फत सुरु आहे.
प्रतिनिधी प्रतिनिधी तुषार देवरे,देऊर
