धुळे जिल्ह्यात व आसपासच्या परिसरामध्ये अनधिकृत बालगृहे, वसतिगृहे, अनाथाश्रम आढळून आल्यास जिल्हा महिला व बाल विकास अधिकारी तसेच चाईल्ड हेल्पलाईन टोल फ्री क्रमांक 1098 वर संपर्क साधावा. अशा अनाधिकृत संस्थांविरोधात कठोर कारवाई करण्यात येईल. असे राज्याच्या महिला व बाल विकास आयुक्त नयना गुंडे यांनी कळविले आहे.
पुणे जिल्ह्यातील आळंदी व ठाणे जिल्ह्यातील खडवली येथे बेकायदेशीर बालगृहे, वसतिगृहे, अनाथाश्रम चालविले जात असून अशा संस्थामध्ये बालकांना अनधिकृतपणे डांबून ठेवण्यात येवून त्यांचे शारिरीक, मानसिक आणि लैगिंक शोषणाच्या घटना घडत असल्याबाबतच्या वृत्तपत्रामध्ये बातम्या प्रसिद्ध झाल्या आहेत. ही बाब अत्यंत गंभीर स्वरुपाची असून बाल न्याय (मुलांची काळजी व संरक्षण) 2015 आणि सुधारित अधिनियम 2021 तसेच महाराष्ट्र राज्य बाल न्याय (मुलांची काळजी व संरक्षण) नियम 2018 मधील तरतुदींचे उल्लंघन करणारी आहे.
धुळे जिल्ह्यात व आसपासच्या परिसरामध्ये अनधिकृत बालगृहे, वसतिगृहे, अनाथाश्रम आढळुन आल्यास जिल्हा महिला व बाल विकास अधिकारी तसेच चाईल्ड हेल्पलाईन टोल फ्री क्रमांक 1098 वर संपर्क साधून बालकांवरील शारिरीक तसेच लैगिंक अपराधास प्रतिबंध करण्यासाठी सहकार्य करावे. असे आवाहन जिल्हा महिला व बाल विकास अधिकारी गिरीष जाधव यांनी एका प्रसिद्धी पत्रकान्वये केले आहे.
