धुळे : मालेगाव येथे सुरू असलेल्या प्रदीप मिश्रा यांच्या शिव महापुराण कथा संत्संग कार्यक्रमासाठी धुळ्याहून जाणाऱ्या भाविकांच्या वाहनांना आज आर्वी जवळ मुंबई-आग्रा महामार्गावर अपघात झाल्याची घटना समोर आली. या घटनेत भरधाव ट्रकने पुढे जाणाऱ्या दोन वाहनांना धडक दिल्याने भीषण अपघात झाला आहे. मुंबई-आग्रा महामार्गावर असलेल्या स्पीड ब्रेकरचा अंदाज न आल्याने भरधाव चालणाऱ्या वाहन चालकाने अचानक ब्रेक दाबला. यामुळे मागून येणाऱ्या दोन कार व त्यांच्या पाठीमागे असलेल्या ट्रक चालकाचे गाडीवरील नियंत्रण सुटल्याने अपघात झाला आहे.
धुळे तालुक्यातील आर्वी येथे मुंबई-आग्रा महामार्गावर स्पीड ब्रेकरजवळ पुढील कार अचानक थांबली. यामुळे पाठीमागून भरधाव वेगाने येणाऱ्या दोन्ही कार एकमेकांवर जाऊन आदळल्या. तर त्यांच्या मागून भरधाव वेगाने येणारा ट्रकने देखील या तीनही कारला मागून जबर धडक दिली. अशा या भीषण अपघातात पाच जण जखमी झाले असून त्यातील दोन जणांची प्रकृती गंभीर आहे.
तीन कार व ट्रकमध्ये झालेल्या अपघातामध्ये चारही वाहनांचे मोठ्या प्रमाणात नुकसान झाले आहे. तसेच वाहनातील दोन जण गंभीर जखमी झाले आहे. त्यांना धुळे शासकीय रुग्णालयामध्ये पुढील उपचारासाठी दाखल करण्यात आले आहे.
